Amodau Dan Draed
Amser: Ar y copa tua 0930
Eira uwchben: dim eira sylweddol wedi ei weld
Llwybr a gymerwyd: Llwybr y PyG
Adroddiad nesaf: Dydd Gwener 29-3-2024
Amodau
Ni welwyd unrhyw eira na rhew sylweddol yn ystod arsylwadau ar gyfer adroddiad heddiw, ond mae eira i weld yn debygol cyn adroddiad dydd Gwener (gweler 'Gwybodaeth Ychwanegol' isod).
Roedd ychydig iawn o eira mân yn agos i'r copa ar adeg yr arsylwadau, ond nid oedd yn effeithio cerdded ar y llwybr.
Diwrnod cymylog, gydag awel sylweddol, a chymylau mwy trwchus yn hel at y prynhawn.
Offer hanfodol
Offer cerdded addas tymhorol, yn cynnwys goleuadau (fel lamp pen).
Bydd cario gogls eira (fel gogls sgïo) yn rhoi modd i warchod y llygaid rhag gwyntoedd oer ac eira yn lluwchio, gan ei gwneud yn rhwyddach i weld er mwyn teithio yn fwy diogel ar y mynydd.
Bydd cario caib rew a rhyw fath o bigau i'r traed yn rhoi dewisiadau i gadw'n ddiogel ar y mynydd ar ardaloedd o eira a rhew.
Gwybodaeth Ychwanegol
Ar ddydd Mawrth yr adroddiad mae'r rhagolygon yn awgrymu bydd y tymheredd ar y copa o dan y rhewbwynt am y rhan fwyaf o'r cyfnod hyd yr adroddiad nesaf dydd Gwener, gyda cawodydd, neu gyfnodau hirach o eira ar adegau. Mae darogan i'r tymheredd ar y copa fod cyn ised â -4˚C (gan deimlo cyn ised â -12˚C ), a'r lefel rhewi cyn ised â 600m.
Golyga hyn ei bod yn bosib y gall eira ddatblygu ar y mynydd yn y dyddiau nesaf, yn enwedig yn uwch ar y mynydd, a dylid felly baratoi am y posibilrwydd yma. Gydag eira yn disgyn, gwynt sylweddol, a thymheredd isel yn cael eu rhagweld, gall fod cyfnodau lle mae amodau yn heriol a gwelededd yn wael iawn.