Amodau
Erbyn arsylwadau heddiw roedd cryn ddadmer wedi digwydd, ond roedd ardaloedd sylweddol o eira a rhew yn dal i fodoli mewn nifer o lefydd. Er fod y peryglon mae'r eira rhewllyd yma yn eu hachosi wedi cilio rhywfaint, mae peryglon gaeafol yn dal i barhau yn rhai llefydd, a gallai yr eira a rhew sy'n cael ei ddarogan cyn diwedd yr wythnos ailgyflwyno peryglon mwy difrifol mewn dim o dro unwaith eto (gweler Gwybodaeth Ychwanegol isod).

Ar lwybr y PyG (a mwynwyr) gwelwyd clytiau sylweddol o hen eira o tua 700m, ond nid oedd yr eira yma yn amharu ar gerdded y llwybr tan tua 900m. Uwchben hyn roedd ardaloedd mwy sylweddol o eira. Roedd yr eira yma yn dadmer, ond yn galed a rhewllyd mewn rhai mannau, gyda posibilrwydd o lithriadau difrifol oddi ar y llwybr yn rhai llefydd o hyd.

Dim ond cyfran gyfyngedig o lwybr Llanberis gerddwyd uwchben Allt Goch, ond roedd yn glir o'r hyn a welwyd er yr eira sylweddol sy'n gorwedd ar y llwybr bod ymyl y llwybr yn glir o eira nes uwchben Bwlch Glas, a bod posib cerdded y llwybr heddiw hyd at  Fwlch Glas heb gerdded ar yr eira. Er bod y posibilrwydd o lithriadau mwy sylweddol wedi lleihau yn yr ardal yma am y tro, gall eira a rhew newydd yn y dyddiau i ddod ailgyflwyno peryglon mwy dybryd mewn byr o dro (gweler Gwybodaeth Ychwanegol isod).

Uwchben Bwlch Glas ar lwybrau Llanberis, PyG, mwynwyr a Chwellyn roedd y llwybr wedi ei orchuddio yn gyfan gwbl gan haen o eira caled rhewllyd a llithrig mewn ambell i fan.

Diwrnod cymylog a niwliog gyda gwyntoedd cymedrol. Yn gymharol sych drwy'r bore, gyda mwy o law yn y prynhawn ar bob uchder.

Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy bob un).

Bydd cario caib rew a rhyw fath o bigau i'r traed yn cynnig dewisiadau mwy diogel ar y mynydd.

Bydd cario gogls (fel gogls sgïo) yn cynnig modd o warchod y llygaid i weld yn rhwyddach er mwyn teithio yn fwy diogel ar y mynydd.

Gwybodaeth Ychwanegol
Ar ddydd Mawrth yr adroddiad mae'r rhagolygon yn awgrymu bydd y tymheredd ar y copa yn agos i'r rhewbwynt i ddechrau, ond yn disgyn o dan y rhewbwynt cyn ddiwedd yr wythnos, gan fod sawl gradd o dan y rhewbwynt erbyn dydd Gwener. Mae darogan i'r tymheredd ar y copa fod cyn ised â -5ºC (gan deimlo fel ei bod cyn ised  â -15ºC ar adegau).

Mae hefyd darogan iddi fwrw ar adegau, gyda glaw fwyaf tebygol dydd Mercher, ond eira yn fwyfwy tebygol dydd Iau a dydd Gwener. Mae eira ar draws ardaloedd ehangach o'r mynydd yn bosib erbyn dydd Gwener.

Mae rhewi hefyd yn gynyddol debygol yn ystod dydd Iau, a rhewi ar draws ardaloedd ehangach yn bosib erbyn dydd Gwener.

Golyga hyn bod eira a rhew yn gynyddol debygol yn y dyddiau i ddod, gyda posib i ddatblygiad rhew neu eira yn ystod dydd Iau ddal rhai allan gyda newid amodau yn ystod y dydd, yn enwedig yn hwyrach ymlaen. O'r rhagolygon diweddaraf mae'n edrych bydd amodau gaeafol wedi dychwelyd yn fwy sylweddol ar y mynydd erbyn dydd Gwener. Bydd unrhyw eira newydd yn disgyn a chael ei effeithio gan wynt sylweddol o amrywiaeth o gyfeiriadau, yn cynnwys o'r de-ddwyrain, dwyrain, gogledd-ddwyrain, a'n nes at y gogledd.