Amodau
Noder: Am resymau diogelwch mae'r adroddiad yma wedi ei gyflawni ddiwrnod yn gynnar ar ddydd Iau oherwydd darogan am wyntoedd cryfion ar gyfer y dydd Gwener arferol.
Roedd eira yn gorwedd ar y mynydd uwchben tua 600m heddiw. Roedd ambell i hen glwt eira yn is na hyn, ond roedd eira newydd yn gorwedd uwchben yr uchder yma. Roedd yr eira newydd yn gorwedd ar dir y mynydd ei hun gan fwyaf, ond hefyd ar ben trwch o hen eira mewn rhai ardaloedd.
Ddigon tenau oedd yr eira newydd ar y cyfan, ac wedi disgyn dan ddylanwad gwyntoedd gorllewinol, neu o'r de-orllewin. Roedd ardaloedd o eira mwy trwchus, gyda'r eira wedi lluwchio a hel mewn rhai mannau. Roedd yn llenwi rhych llwybr Llanberis yn uwch ar y mynydd, ac roedd eira wedi hel ar lwybr y PyG a llwybr y mwynwyr o dan Bwlch Glas, lle oedd eira newydd yn gorwedd ar ardaloedd sylweddol o hen eira caled.
Roedd yr eira yn ddigon llaith ar y cyfan, gyda hyd yn oed yr eira newydd yn prysur droi yn ddwys ei natur. Gwelwyd ambell i fan rhewllyd, ond hefyd nifer o ardaloedd yn dechrau datblygu cramen rewllyd ar ben yr eira. Gallai unrhyw ail rewi droi ardaloedd eang yn rhewllyd iawn.
Gwelwyd ambell i fargod (cornice) yn ystod yr arsylwadau, er mai cymharol fychan oeddynt o ran maint, byddai dal yn syniad annoeth iawn cerdded ar, neu yn agos i'r rhain, hyd yn oed os nad yw'r strwythur yn crogi uwchben gwacter (overhanging). Roedd nifer i fargod newydd yn tyfu ar ben sail hen fargod dwys.
Diwrnod cymylog a niwliog, gyda gwynt sylweddol, a chawodydd neu'n bwrw am gyfnodau hirach ar adegau. Roedd yn bwrw eira ar adegau cyn ised â 600m, gyda glaw cyn uched â 900m ar adegau eraill.
Offer hanfodol
Offer cerdded addas tymhorol, yn cynnwys goleuadau (fel lamp pen neu ddwy).
Bydd cario gogls eira (fel gogls sgïo) yn rhoi modd i warchod y llygaid rhag gwyntoedd oer ac eira yn lluwchio, gan ei gwneud yn rhwyddach i weld er mwyn teithio yn fwy diogel ar y mynydd.
Mae caib rew a chrafangau cerdded (crampons) yn fwy tebyg o alluogi symud yn ddiogel ar eira llwybrau PyG a mwynwyr (gan gymryd bod peryglon eraill posib), hyd yn oed os mai rhan gymharol fechan o'r llwybr allai fod eu hangen
Gwybodaeth Ychwanegol
Ar ddydd Iau yr adroddiad mae'r rhagolygon yn awgrymu y bydd y tymheredd ar y copa yn aros o dan y rhewbwynt am y rhan fwyaf o'r cyfnod hyd nes yr adroddiad nesaf dydd Mawrth, ond bydd cyfnodau pan mae'r tymheredd yn agos i, neu uwchben y rhewbwynt hefyd. Mae darogan y bydd y tymheredd ar y copa cyn ised â -5˚C, gan deimlo cyn ised â -16˚C ar adegau.
Mae darogan am wyntoedd cryfion ar adegau, gyda gwynt hyd at 100mya yn cael ei ragweld at ddydd Gwener (a rhybudd Oren wedi ei gyhoeddi gan y swyddfa dywydd), ond hefyd hyd at 75mya a 70mya ar ddydd Sul a dydd Llun.
Mae darogan am gyfnod o ddadmer cryf yn oriau mân bore Gwener, a gall hyn ddadmer y rhan fwyaf o unrhyw eira newydd. Gall unrhyw eira sy'n goroesi'r cyfnod yma o ddadmer (sy'n debygol o gynnwys o leiaf yr ardaloedd o hen eira dwys), droi yn galed a rhewllyd iawn wrth ail rewi.
Gyda posibilrwydd am ardaloedd rhewllyd, a rhywfaint o eira newydd ar adegau, dylid paratoi i ddod ar draws ardaloedd o amodau gaeafol ar y mynydd. Mae hefyd posibilrwydd o gyfnodau o welededd gwael ar adegau.